2011-09-15T22:31:00.005-04:00

Den cara di e cantidad grandi di casonan di HIV Aids copla na e uso di droga, e gobierno Portuges na 2001 a dicidi pa purba un opcion diferente pa gara e timon di e problematica y hibele den un otro direcion. Nan a decriminalisa e uso di heroina, cocaina, marijuana, LSD y mayoria di tur otro droga illicito cu ta obtenibel ariba caya. E teoria ta lo sigiente: concentrando ariba tratamento y prevention envez di encarcelacion di usadonan y adictonan, eventual lo hiba na baha e cantidad di morto y infeccion den nan país.
5 aña despues, e cantidad di morto procedente di overdosis di droga a baha for di anualmente alrededor di 400 pa 290 pa aña, y e cantidad di caso di infecionan nobo di HIV door di huso di hangua sushi of infecion pa motibo di a injecta nan mes cu heroina, cocaina, y otro sustancianan di ariba caya a baha drasticamente di 1400 caso na aña 2000, pa solamente 400 caso na aña 2006, segun un rapport cu a sali aña pasa traha door di CATO Institute na Washington D.C..
Envez di wordo hinca den prison, e adicto tin e oportunidad awo di bay den diferente centronan pa tratamento y aki ta siña con pa trata cu nan habito di tur dia y aki siña drecha nan bida pa despues poco, poco sali completamente for di e mundo di droga.
Bow di e plan Portuges castigo pa e hendenan gara ta bende droga y ta traficando den droga no a cambia, dealernan keto bay ta wordo encarcela of tin cu paga un multa dependiendo di e gravedad di e crimen. Pero hendenan cu ta wordo gara ta uza of cu tin un cantidad minimo den nan posession- esaki ta difini pa e cantidad di droga equivalente na 1o dia di consumo personal- ta wordo hiba dilanti un loke nan ta yama un "Comision di Disuasion" un departamento di gobierno crea den e ley di 2001.
Cada comision cosistiendo di tres persona ta inclui a lo menos un abogado, un juez y sea un trahado social of un persona di salubridad publico.
E comision aki por recomenda tres diferente manera, tratamento, un multa minimo of no ta duna ningun sanction.

Di otrobanda un criminologo for di Universidad di Maryland, na College Park a bisa cu e ta duda cu e decriminalization ta e unico motibo cu e huso di droga a baha na Portugal, añadiendo cu tin un otro factor cu e ta pensa ta especialmente grandi bow di e teenagersnan y esey ta e rebajo mundial den consumo di marijuana. Pero si e la admiti, cu e critica anterior cu a bisa cu Lisboa lo bay bira un centro of é Mecca di droga pa motibo di nan leynan nobo di decriminalisacion tabata incorrecto.
E decriminalisacion di droga seguramente a yega na resultadonan positivo na Portugal, como cu e la baha gasto ariba e lomba di salubridad publico a consequencianan di uso di droga y no a hasi Lisboa un destinacion di turismo di droga.
Un vocero di oficina di droga y criminalidad di Nationan Uni a laga sa cu
decriminalisacion na Portugal "ta mustra di ta funcionando bon". E la añadi cu su oficina awor ta poniendo mas enfasis ariba mejoracion di e aspecto di salud di e patiente - husado di droga, por ejemplo infeccion di hangua, pero cu e NO ta completamente na fabor di decriminalisacion como cu e ta bisa cu "e ta hole na un eventual legalisacion" total.
E leglislacion di droga ta remove tur criminalisacion, o sea di produci, bende y e consumo di droga; ningun pais a yega di purba e leynan aki ainda.
Sinembargo e decriminalisacion manera e ta wordo practica na Portugal , ta elimina encarcelacion pa e consumidor of husado, pero na e mesun momento ta keda mantene tur e mesun castigonan penal pa e dealer of bendedonan di droga. España y Italia tambe ya caba a decriminalisa e uso y e recientemente e presidente di Mexico tambe a propone di hasi esaki den futuro sercano.
E cas Blanco di Estados Unidos y igualmente e gobierno di Aruba, ambos gobierno ya pa hopi aña ta nenga di duna comentario ariba e tipo di rapport nan aki, pasobra nan ta di e mentalidad y pensamento di laga tur kos keda manera e ta.
Pero e actitud aki ta pone uno pensa cu porta tin mucha mas placa envolvi den laga droga sigi circula den ambos economia pa tur hende gana placa?
Na Estados Unidos tur hende sa cu e hincamento di hende den prison pa infraccionan minimo ta "a way of business". Pakiko? Posobra cu mayoria di prison na Merca no ta den man di gobierno pero ta den man di compania priva ariba contract cu gobierno como cu segun mandatarionan Mericano e commerciantenan ta maneja e prisonan aki mas eficientemente y ta costa e ciudadano Mericano menos placa cu si gobierno mes maneja nan. Tur hende sa cu pa bo tin un negoshi bo mester di mercancia y nan mercancia ta bin di mantene e typo di leynan aki cu ta yena prison cu hende cu eigelijk no ta dje tanto malo cu nan mester keda encarcela pa 5 o 10 aña. Pa keda mantene e prison nan aki yen pa nan compienchinan cu ta sponsor nan campaña pa gobernador, senador of congresista, ta laga e leynan aki keda vigente pa nan por sera hende facilmente y yena prison y cobra gobierno pa "e trabow tan bon hasi" un circulo vicioso di placa entre amigos.
Na Aruba nos tambe tin hopi ejempelnan di "friends and family" den comercio pero ainda no den estremo di cu e prison na Aruba ta ariba un contract independiente y ta un negoshi pa saca placa for di gobierno pa core campaña. Struisvogel porta equivoca akinan ya cu e no sa mucho di prison e unico biaha e la wak prison di Aruba ta na CNN y Fox dia cu periodistanan Mericano a bay bishita Joran van der Sloot pa un entrevista.
Na Aruba tambe e situacion di criminalidad a bay completamente for di man. E falta total di conocimento di gobierno y su ministro di Husticia en particular ariba e materia di combati criminalidad a causa cu e criminalidad na Aruba a bira algo hopi preocupante pa nos comunidad. Pa basta gobernacion caba e ministerio di Husticia no tin ningun control ariba criminalidad na Aruba.
E adictonan ta cana rond den caya grandi y ta ta hasiendo mas destrucion cu nunca y si no ta pa ayudo di Mambo y sponsernan particular ainda hopi mas lo por ta canando rond. Nos tur na Aruba por keda draai rond y bisa cu droga ta malo pabo y cu ambos e bendemento y e husamento di droga mester keda castigabel pa ley, pero no ta bin solucion den ningun aspecto di e problematica aki, si no tin plan di manejo y alavez un concensus di unda nos tur kier bay cu e polemica di droga y choller. Lesando e articulo aki nos tur mester cuminsa pensa si decriminalisacion ta un opcion pa nos Isla.

Si e ta un solocion pa Portugal, Italia, Spaña, Mexico y Hulanda porta nos por sikiera considera nan ideanan y un plan di manejo pa posiblemente ejecutanan meskos of traha nos mes un version crioijo aki na Aruba.

Si kiera un biaha Struis ta di a cuerdo cu e ponencia siman pasa na Alemania di Pater Lampe.

Ok, Fatha light up di tampi!

HET STRUISVOGEL RAPPORT ARUBA BLOG