Ya ta bay birando dos luna caba cu gobierno nobo a sinta na Aruba.
KTK desde e tan esperando cambio aki na Aruba?
Wel nos por ripara cu hopi di e pueblo cu a vota, di un manera of otro tambe a aporta de e rescate di nos edificio di gobernacion e asina yama "Kas Blanco" di Aruba. Ta bay un fuerte abrazo di reconocimiento y di danki na un y tur cu a yuda cu nan trabow of cu a contribui y trece e cantitad di cuminda, awa, juice, softdrinks y material di verf y contruction pa por a hasi e trabow necesario pa nos gobierno por goberna bow di un dak den un tempo record.
Sin boso aporte ainda nan lo ta wardando pa D.O.W aproba y ehecuta e trabownan necesario.
Mayoria di e ministerionan ya ta canando cu pasonan chiquito y cu hopi cautela ya cu ta obvio cu tur di nan mescos cu nos kier sa na unda nan ministerio y Aruba "berdaderamente" ta para.
E manera sistematico di tapa e berdad di e ultimo 8 aña a penetra fuertemente den e aparato gubernamental y ta parce cu tur e pajaritonan trahando pa gobierno a cuminsa canta hunto y esaki lastimamente na e mesun momento. Ta derepente nos a ripara cu ta trupial nan ta ya cu pa ocho aña ta manera chuchubi nan a zona. Por comprende cu esaki ta trece cu ne hopi desordo y tambe mal informacion.
Aruba y mundo henter mester prepara su mes pa un temporada ainda mas largo di secura y di posibel tempestad ya cu e situacion mundial NO ta mustra di ta cambiando a termino corto. E prijs di oro y di crudo ta keda schommel pero lastimamante ta duna tur indicacion constantemente di ta bay suigi subi y esaki den un forma drastico.
Struis no ta kere cu mundo lo bay ta cabando pronto pa awor, pero porta aki 14.3 Billion di aña si nos tur lo ta nada mas cu un pida stof chiquito den universo. Aunque cu ariba internet tin varios articulonan cu ta bisa diferente y cu nos tin solamente 2 aña prome cu mundo caba, ami ta di opinion cu ta mihor cu nos concentra ariba cos nan caminda cu si nos por hasi un diferencia y trata na hasi bida pa un y tur aki na Aruba mes un tiki mihor.
Aruba tin varios reto su dilanti, entre otro sania nos turismo, drecha nos schoolnan y educacion en general, re-organisa nos aparato policial y cuminsa modernisa y aproba nos leynan. Hasi PAPIAMENTO porfin e lenguahe di instruccion den nos schoolnan basico y keda tene e tres otro lenguahenan como parti di e curiculum keto bay obligatorio y no por wordo substitui.
Mester tuma decisionan grandi den nos aparato di AZV cu despues di varios "expertonan" te ainda ta keda perde sumanan GRANDI in-necesariamente. Tambe mester bay pone tur cu ta ricibi salario den gobierno responsabel pa nan trabow (si ta full time, un minimo 8 ora). No por ta asina cu hende ta cobra y no ta traha.
Manera cu a pasa na bestuurskantoor mester bay pasa na Aruba en general.
Tur cu bin sea local of importa mester bini pa traha y aporta na e cambio cu nos kier trece aki na Aruba.
Tin hopi hende cu ta buscando un cabey di boto gratuito y ta abusa di ya ta emplea den gobierno y no kier traha nin un seconde ni 0.01 cent extra pa ningun hende. E actitud aki ta laga e systima putri di warda otro pa hasi trabow pabo y e sistema di keda haya placa tur luna, sin ta merece y no ta traha pa loke ta wordo paga, pa keda vigente. E circulo visioso di kier hunga futbol pero no ta dispuesto di subi tereno y wanta golpi ta bay trece cu ne cu kos lo no bay cambia y gasto lo bay keda subi ya cu mester busca otro pa traha pa e abusadornan floho aki cu ta biba lekker. Na Ingles nan ta bisa "shape up or ship out" crioyamente: Bo ta "drecha e mal maya of mal fashi cu bo tin of nos ta barcabo afo".
Nos ta yegando na un crusada caminda cu mester bay tuma decisionan fuerte y poco popular na benificio di nos tur. No por laga e kranchie aki habri mas!
Abo ta cla pa hala mara faha, hisa bo manga di camisa y pa cuminsa traha?
