Kiko a pasa? Nada un pasa...

Struis a sali foi su winter slaap? of ta na soño e ta mes kos cu tur hende?

Ya pa hopi tempo aki na Aruba ta parce cu nos tur ta pretende cu
Tur kos ta A.O.K., No tin problem y nos ta Ariba un rust!

Pero e berdad ta: Kiko a pasa? nada un pasa?

Hopi hende sa di kos y ta mustra cu nada no ta wordo hasi di ningun banda pa yega na é berdad. Esun cu purba ta cay den problema, dus miho sera boca y keda keto di loke bo sa, bo por a wak of bo por a tende! Toch na final ningun hende ta wordo teni responsabel pa cu nan actonan bergonsoso, bochornoso y DIFINITIVAMENTE castigabel pa leynan vigente aki na Aruba.

Ta di kon Struis ta pensa asina? Ta mi so ta lele atrobe?

Abo e lesado di e articulo aki, bo no ta pensa bo mes ta di kiko Struis lo por ta papia di dje?

Den Struis su cabes ta sweef un par di pregunta, porta asina boso ta yega na compronde ta di unda Struis ta bin...

E preguntanan cu ta sigui no tin di haber cu otro, nan no ta poni den algun sequencia di insinuacion o asocacion, nan ta nada mas cu enigmanan den nos comunidad cu pa Struis ta imposibel cu ni un hende sa maske ta algo di nan y Struis ta di pensamento cu hopi aki na Aruba sa precies kiko ta kiko!

Ta tur di nos den un comunidad asina chiquito ta dispuesto pa sigui obstaculisa y impendi e preguntanan pendiente aki di yega na un conclucion of solucion favorabel?

Esaki ta Struis su 'WISH-LIST" di pregunta:

Unda e bendedornan di droga ta para? cua skina, ki hanchie? ainda boso No a wak e sitio boso dilanti? ta siego mes boso ta anto...

Ken ta e labadornan di placa aki na Aruba? No tin accountant, no tin banquero, gobernante o politico cu tin algun idea ken nan ta kon nan ta hacie? Ainda bo no a tende, bo no por wak nan? Tin hende ta biba grandi y ta play poderoso y ta gaña traha? Tur hende sa cu e tiki trabow ey no por duna asina hopi luho? Nan a gana loteria di Merca, Inglatera, Portugal o ta di Nigeria.

Ken ta e homber cobardenan cu ta bati nan muher (nan)? Esaki ta inclui supuestamente sierto miembro di parlamento, ministernan, politiconan, cantantenan, dirigentenan di banda musical paden y pafor di calyspo contest? hefe di empresa grandi, maestronan di school, dirigente, coach y managernan di equipo deportivo etc.

Cua di e asina yama "Child Molesters" nan aki na Aruba- un biaha mas esaki ta inclui hopi di e mes un cantantenan, comerciante, integrante di banda musical, dirigente di equipo di baseball y demas otro deportenan, maestronan di school, etc., etc., etc. -a haya e castigo adecua pa cu nan fechoria of ta nos tur ta tapa pa nan keto bai? Por ta tur di nan diripiente a stop di abusa di mente y curpa inocente?

Ken a asesina Poentje cruelmente y a lage benta dilanti di su porta di cas, ta dicon e persona of personanan aki NO ta sera?

Ken a mata y unda e restonan di Natalee Holloway ta? Ainda boso por kere ku NO tabata tin un cover up di diferente instancia aki na Aruba?

Pakiko despues di hopi aña di acusacion di tin gobernante aki na Aruba cu nan friends y nan family ta horta placa di pueblo o ta complice di contratonan corrupto, te ainda nin un a cay sera?

Con por ta cu aki na Aruba ta un man di hende ta doño y ta apoderando di tur kos aki na Aruba?

Pa colmo ta pakiko hende cu placa (y no mester di fia?) so ta haña tur plaka pa fia di banco local? Awor te hasta fondonan di Apfa ta parce di ta den bon man, "Dushi Om"

Ken ta e companianan y ciudadanonan miyonario na Aruba cu NO ta contribuyendo na e caha di gobierno y pakiko no?

Ta di unda tin asina hopi contratistanan stranhero aki na Aruba y unda e placa cu nan ta gana aki na Aruba ta wordo deposita? kiko ta e porcentahe di trahado local (naci na Aruba, no bruha tera) compara cu stranhero ariba nan payroll?

Boso a yega di tende di "Conflicto di Interes", con por ta cu constantemente personahenan (apunta pa gobernantenan) cu ta forma parti di un fundacion pa aporta na deporte, of ta miembro di directiva di entre otro organisacion deportivo, educacion, telecumunicacion, aeropuerto, transporte publico, cultura, turismo ta precedi of ta haña contratonan pa cu nan mes compania of ta forma parti di un compania cu ta haña es previlegio aki pa explota e placa aki? Acaso nos tur ta forma parti di un pueblo sinberguensa con na ta comprende e concepto di conflicto di interes?

Tanto trabao di departamento di estadistica di gobierno? Kiko ta e porcentahe di trahado den gobierno cu no ta trahando y si ta cobra sin traha tur fin di luna? y ya pa cuanto aña caba? y cuanto ta constantemente ariba trip international of di paranda local y ta come bebe tur caminda ariba cuenta di gobierno of awor ta 'ATA su Generis'?

Cuanto placa e eventonan di Fashion Week y Aruba Film Festival ta costa nos of ta genera den caha di gobierno? y ken ta esnan cu ta benificia desde September 2010 cu crediscars cu ta swipe tur caminda? Acaso akinan un biaha mas nos por ta papia di conflicto di interes? Tin empleado di gobierno cu ta organisando evento priva cu plaka di pueblo pa su propio interes? Noticia positivo ta merece recompensa? kisas Man of Woman of the Year?

Ya Struis por tende caba: Un estudio preliminario ge-sponsor door di Aruba Bank, AHATA y ATIA y conduci pa e compania Europeo DBTH Group specialisa den "Branding Turistico" ta pone un estimate di e impacto di e dos eventonan aki ariba nos economia aki na Aruba di casi 200 Miyon Florin pa aña. Un placa bon presupuesta...PABIEN!

Pakiko gran mayoria di prensa aki na Aruba ta sea floho of ta complice di tapa tur informacion 'Real'?

Pakiko mayoria di pregunta hasi na gobernantenan ta semper 'soft pitch'? y mayoria di noticia ta 'Pre-packaged' pa e mesun cas di informacion? Lastimamente esaki ta conta pa 94.1% di Prensa.

Aki na Aruba ta nos tur ta ignorante, bobo? of ta floho nos ta? of por ta menera e cantica ta bisa, pa lubida problema nos tur ta: 'Ban Bebe' of por ta e otro cancion 'Haltura ta nos Cultura'.

Por cierto DBTH Group kiermeen: Don't Believe The Hype...

Ta di kon despues di 58 aña di carnaval ainda SAC no por 'get su act together' y ta sigui bringa cu tur grupo participando den carnaval, grupo musical y ta daña e ambiente tur aña pa e pueblo carnavalesco. Regla ta wordo cambia y adapta diariamente sin nigun consulta cu tur e protagonistanan den e espctaculo. No ta prepara nada di antemano y e poco cu ta ariba papel ta wordo cambia y semper ta culpa tur hende rond pa cu nan problema. No a trece nada nobo pa carnaval den ultimo añanan y ta keda ripiti e mes un errornan sperando cu cos lo bay drecha na caminda? Mucho hopi evento, y mucho hopi parada den un tempo hopi corto. Enves di hasi 10 cos bon organisa, tin 40 evento di mediocridad! Elimina loke no ta sirbi concentra ariba loke si ta traha, purba un paar di kos nobo: porta hiba lighting parade den stadion cu lus sendi y yen di ambiente cu bandanan poni strategicamente den e stadion y sigui ban padilanti!

Struis lanta, lanta, lanta saca bo cabes foi di tera! Ta na soño bo ta atrobe? E parada di carnaval ya ta yegando serca!
Wak e trailer di Tsunami ta zona dushi, dushi ya cu nan a pone sucu 'Splenda' den e generator, ata Lienchie ta jump cu Champagne sin por bai padilanti un stap! Pura bin bou di nos tent colorido cu 'Local Branding'. Nos tin BBQ y sopi di galiña, Dushi Yiu!

Boso tur sa masha bon cu mi No ta come galiña, mi ta vegetariano!

y ademas: Cacho no ta come cacho!

Carnaval ta sigui... cu of sin SAC.

Momo drumi bon...otro aña tin cos pa drecha pero laga e carnavalistanan para!

Feliz Aña 2010, 2011, 2012, e tempo pa e cambio a yega...

Nos tur sa cu ya pa hopi aña caba estudiantenan mester carga casi 60 lbs. di buki hiba school den rug tas of akte tas tur dia. Ta ki dia ta cuminsa pensa di averigua con por download e mes un bukinan aki y pone ariba laptop of Ipad di cada un, pa un y tur tin aceso na dje y tur esaki probablemente mas barata cu e prijsnan exagera cu ta pagando wholesalersnan cu ta probechando di prijs haltisimo di buki y revista, sin cu niun hende ta bisa of hasi algo. Di otro banda nos compania especialista di branding den Carnaval Setar "100% Arubiano" , mester cuminsa habri man y hasi internet mas accesible pa un y tur pero especialmente pa e estudiante y trahado ambisioso. Ki mishi cu no tin internet na school of bibliotheek y si tin mes, mester cumpra kaarchie individualmente pa por subi ariba internet.
Mundo ta cambiando na un velocidad hopi rapido, y e individuonan cu ta den posicion di tuma decisionan na diferente departamentonan di gobierno y institutonan educativo, mester wak e "Big Picture" y stop di driespidi palaka di mercadeo rond na koi loco manera "Sparkling Tour" y na SAC cu NO ta trece beneficio pa pueblo o en particular juventud pero solo na algun hende en particular. Cuminsa wak mes leuw cu boso cartera y nanishi. E manera di pensa biew cu ta kere cu internet ta principlamente pa hunga wega y hasi malo door di download pornofrafia y musica ilegal ta anticua y ta un pensamento erroneo. Awendia internet of e asina yama WWW: World Wide Web ta e "Big Equalizer" e unico herment pa hasi un y tur igual esaki ta berdad especialmente aki na Aruba.
Manera milies di añanan cu a caba di pasa den nos historia tur rond di mundo, sabiduria awor -No mas ta pa hende cu placa y cu contacto pa por drenta bibliotheek grandi of universidad prestigioso y cu acesso priviligia na informacion valioso. Internet democraticamente ta duna tur acceso na e mes un informacion sin destincion di color, rasa y standing financiero den comunidad.
Ta suplica dirigentenan di Setar pa baha prijs y duna tur hende oportunidad na informacion valioso no solamente na esun cu tin placa pa paga prijs halto pa minuut di internet.
Duna deal mas atractivo pa aceso sin limite y stop di purba cobra hende di clase media y esun nan cu un tiki mas dificultad pa yega na placa e deal inferior y exageradamente halto di cumpra kaarchie.
Esaki specialmente ta valido pa tur school y lugarnan di enseñansa pa empleo etc., cu mester por tin mas aceso di por subi y hasi nan trabow of huiswerk, hasta den pauze!!!, sin tin cu busca papel pa skibi, buki o revista pa lesa y haña informacion. Awe cu e computer estilo Ipad na prijsnan di entre $100 pa $499 dollar mundialmente. Ban prepara aki na Aruba pa e ola nobo aki y no ta atrasa meskos cu a keda pega añanan den e era di blackberry y no tabata prepara pa e invasion di e android cu a bini casi 2 aña despues di e otro inovacion anterior di Apple e Iphone cu hunto cu awor e Android style ta dirigiendo e mercado di cellphone tur rond di mundo y no manera aki na Aruba e blackberry.

Ban nos tur tene mas atencion pa ta sigur cu Aruba chiquito pero cu ambicion grandi pone tur herment na disponibilidad di tur cu kier traha pa bai padilanti y stop di mercadea pa haña fama so.
Por sierto e articulo aki a wordo skribi DOS aña pasa!